Wed, 27 May 2020

Cebuano News: NGCP mihatag P1-B alang sa pagbatok sa COVID-19

Philippine Information Agency
03 Apr 2020, 18:38 GMT+10

TAGBILARAN CITY, Bohol, April 2 (PIA) -- Agi og pagsuporta ni Presidente Rodrigo Duterte ug sa nasudnong paningkamot nga batokan ang pandemic sa coronavirus disease (COVID-19) sa Pilipinas, ang National Grid Corporation of the Philippines (NGCP), ang nagdumala sa grid ug transmission services sa koryente sa nasud midonar og PhP 1 Bilyon alang ug hinabang sa mga medical frontliners.

Sa ilang suwat ngadto kang Presidente Duterte, ang NGCP mipadayag sa ilang suporta sa nagpadayon nga gubat batok sa pandemic, ug kini pinaagi sa PhP 500 milyon nga donasyon alang sa mga gamit ug ekipos medical, samtang lain nga PhP 500 milyon ang gihatag aron may magamit sa pagpamalit og ubang mga gikinahanglan pa sa pagtubag sa COVID-19, segun sa matumbok sa buhatan sa Presidente.

"Pinaagi sa pagpakig-alayon sa buhatan sa Presidente, gipadayag sa kagamhanan ang buot nila nga inay donasyon nga salapi, kini ipalit na dayun sa medical nga kahimanan sama sa video laryngoscopes, ventilators, ug mga taas nga matang sa face masks,"saysay sa kompanya.

Ang P1 B nga donasyon sa NGCP, lahi pa sa unang tabang sa kompanya, sama sa mga personal protective equipment (PPE), face masks, pagkaon, ug uban pang supplies alang sa mga frontline workers sa health industry ug sa Meals on Wheels program nga nanghatag og init nga pagkaon ngadto sa mga mas naglisud nga komunidad sa nasud.

Ang kaabag sa NGCP nga State Grid Corporation of China (SGCC), minghatag usab og 500,000 ka face masks pinaagi sa Philippine Red Cross.

Gipasalig pa usab sa NGCP ngadto sa publiko nga dili sila moundang sa pagpangita og kahigayunan nga maka-abag sa kagamhanan nga nakigbatok niining COViD pandemic.

"Nakasabut kita nga ang bugtong paagi nga atong mabuntog kining global nga hulga, kini lamang ang atong pagtinabangay," dugang sa NGCP.

Ang NGCP usa ka pribado nga kompanya nga gipangunahan sa mga Pinoy, ug sila ang natahasan sa pagpadagan, pagdumala, pagmintinar ug pag-ugmad sa power grid sa nasud.

Ang NGCP gipangunahan sa may labing dagko nga shareholders, sila si Henry Sy, Jr. ug Robert Coyiuto, Jr. (rahc/PIA-7/Bohol with NGCP)

More Shanghai News

Access More

Sign up for Shanghai News

a daily newsletter full of things to discuss over drinks.and the great thing is that it's on the house!